4u2 Profit - Marketing Solutions Review on APSense RevPage

4u2 Profit - Marketing Solutions Review on APSense RevPage

Wat is kultuurskok?

Ek het daarvan gehoor toe ons nog in Suid Afrika gewoon het, maar 'n mens verstaan dit nie heeltemal nie voor jy self in die land is en dit ervaar nie. In die begin was daar nie so iets nie, maar 'n mens begin dit eers besef die dag wanneer jy in 'n vaste werk is.

Dinge word net anders in New Zealand gedoen en dit is vir hulle baie moeilik om te verstaan dat die Suid Afrikaners alles kan doen. En daarmee bedoel ek dat ons mans werklik baie dinge kan doen. 'n Elektrisien weet hoe om ligte te ruil, stowe te bedraad, warmwaterstelle te installeer wat nog loodgieter werk ook insluit. Hier sal die loodgieter die pypwerk doen, 'n installeerder die warm water stelsel op sy plek vas sit en die elektrisien net die drade koppel. Jy moet geregistreerd wees om elke werk te doen want gebeur daar iets en mense kry seer, word die persoon in elke afdeling verantwoordelik gehou en gedagvaar vir die skade.

Moenie dink dat as 'n tafel se poot (staal pote en hout blad) breek, en dit na die werkswinkel gestuur word om herstel te word, enige persoon maar die sweis masjien kan vat en dit reg maak nie. Nee, slegs gekwalifiseerde persone mag dit doen en 'n sertifikaat uit reik vir die werk. Die nutsman sal dan weer die blad terug skroef.

Bestuurders het nie persoonlike assistente nie. Hulle is verantwoordelik daarvoor om al die administrasie werk self te doen. Tik werk, pos, bestuur van hul afdeling. Hulle kan nie glo dat dit in Suid Afrika anders is nie.

Vir ons dokters wat hierheen kom, en mangels en blinde derms uit gehaal het, is dit 'n groot skok as hulle vertel word dat hulle slegs medisyne mag voorskryf. Ons verpleeg personeel wat drips kan in sit, mag dit nie doen nie, want slegs 'n dokter mag dit doen.

In die werkplek sal jy twalf tot vyftien verskillende volke in een afdeling vind. Jy moet fyn luister en jy moet presies weet wat hulle se en bedoel. Een voorbeeld wat met my man gebeur het was dat 'n Maori hom oor Suid Afrika se misdaad uitgevra het. Hy vertel die man dat twee ouerige mans met 'n panga dood gekap is. die Maori het hom verbaas aangekyk en net sy kop geskud. "You say that they have killed two old men with a panga?"

Die man kon nie verstaan hoe jy iemand met 'n 'panga' kan dood kap nie. Hy het net sy kop geskud en my wederhelfte weer daaroor uit gevra. Hoogs ontsteld kom vertel hy my die ding en voel dat die man dink hy bak kluitjies. Drie dae later wys my man vir die man om die 'tree fern' onder skoon te maak.
"You mean the panga?"

Onmiddelik wou my man kwaad word.

"No man, the tree fern."

"Well mate, we call this a panga."

G'n wonder die arme man kon nie verstaan hoe 'n panga mense met een kap kan dood nie. En ons neem hom ook nie kwalik nie want dis taal verskille. Ons het in Suid Afrika die Yukas geken maar hier is dit 'n "cabbage tree".

'n Geyser is nie 'n warm water stelsel in jou huis wat jou aan warm water voorsien nie.

Hier is dit 'n geyser:

Kokende water wat in die lug in op spuit. Dit is as gevolg van die vulkaniese aktiwiteit onder die grond.
Kyk gerus hoe dit spuit in die volgende twee videos





Indien jy enige vrae het, plaas dit gerus in die 'comments', ek is bereid om jou so eerlik en volledig as moontlik te antwoord.

Inligting kom handig te pas

Uit ondervinding het ek besluit om aan jou soveel moontlik inligting oor die ander sy van immigrasie te verskaf as wat ek kan. En ek is dankbaar dat ek self navorsing oor hierdie aspekte gedoen het, want ek kry dit self ook nodig. Weer is ons genoodsaak om ons goedjies te pak en 'n ander huis te gaan soek. Dis gewoonlik wanneer 'n huis verkoop word dat jy genoodsaak word om te trek en dit is natuurlik die nadeel van huur ne.

As ek nie toegepas het wat ek hier op hierdie blog vir jou vertel het nie, sou ons beslis in kookwater gewees het.

Dit maak die verhuising soveel maklikker sonder enige onaangenaamhede. Dit is baie duidelik dat die agente jou nie al hierdie inligting gee nie, en hulle is nogal uit die veld geslaan as jy aandring om sekere van die goed gedoen te kry voordat jy in die nuwe huis in trek.

Toe ons dit vir die agent se, kon ons duidelik die verbasing en selfs onsekerheid op haar gesig sien.

"How long did you say are you in country?"

Mmm ... nie gedink Suid Afrikaners weet hoe om katvoet te loop nie ne!

Ons het jare op 'n plaas of 'n plot gewoon en ons sukkel bietjie om in die dorp aan te pas. As 'n mens eers die stilte gewoond is, is selfs 'n jaar nie eens genoeg om jou aan die stad se geremoer gewoond te maak nie. Dis nie lekker om kort kort op te pak en te trek nie, maar ons is opgewonde oor die feit dat ons uiteindelik op 'n hoewe kan gaan woon waar ruimte en vryheid en stilte is. Geen motors, dromme, partytjie geraas ... net die stilte en die vryheid van beweging.

Sjoe, dis erg om jou buurman te moet hoor hoes in sy huis, te hoor wat hy vir sy vrou te se het, en die honde se aanhoudende geblaf oor onbenullighede!

Ons het ook geleer dat area baie saak maak. Ons het baie oor die kulture al geleer en ons geniet dit nog steeds. Verruil dit nie om weer terug te gaan SA toe nie. Geen diefwering voor die vensters en deure, en jy kan maar iets buite vergeet. More oggend sal dit nog daar wees. Nou moet ek ook se dat dit is wat ons wel ook in SA beleef het.

Ek hoor iemand se: "Werklik? Waar?"

Ons het 15 jaar op Kleinfontein gewoon en dit het ons voorberei vir New Zealand. Self al die werk moes doen, stilte en vryheid, maar dis net op die plaas. Dis nie die res van Suid Afrika nie en vir hoe lank hulle nog in rus en vrede daar gaan woon weet ek nie. Ek praat van rus en vrede van moord, roof en diefstal. Of wag, laat ons liewer nie fyner sny nie.

Suid Afrika is en bly 'n mooi land en sal altyd my land bly, maar op die oomblik het ek geen begeerte om terug te gaan daarheen nie. Ek verlang na my vriende en familie, maar hier is nuwe Suid Afrikaanse vriende en ook van ons familie. Die groot verskil is dat ons hier mekaar se hande vat want ons het mekaar nodig in ondersteuning - geestelik en selfs ook finansieel. As hierdie 'broederskap' maar net so tussen ons mense in ons eie land kon gewees het. Vriende word vir jou soos familie en ons ry selfs honderde kilometers om bymekaar uit te kan kom. Kuier 'n hond uit 'n bos uit en die afskeid is swaar.

Wanneer ons so deur die land ry, dan wens ek my ma of my kinders was hier om dit saam met ons te kon beleef het. Ek geniet die weer. Ek geniet die natuur en die skoon lug, ek geniets selfs af en toe die polsing van die stad. Ons is nou eers 'n jaar hier, en dit mag als nog baie nuut vir ons wees, maar dis presies wat mense destyds vir my in die Laeveld ook gese het. Ons het 10 jaar daar gewoon en elke dag was 'n wonder vir my. En tog het die Hoeveld my nog steed bekoor.

Waar het dinge vir ons begin verander in Suid Afrika? Die dag toe ek vir my kinders in London gaan kuier het. Dis die dag wat ek besef het dat ons sal moet wortels uit trek, opofferings moet maak om 'n nuwe heenkome te gaan soek. Dit was 'n lang en onseker besluit. Dis vreemd, maar ons het gedink soos ons voorouers destyds in die Kaap moes gedink het. Gaan ons buig onder die Engelse regering of gaan ons maar trek, die onsekere toekoms binne.

Met die Bybel in die een hand en geloof in die ander, het ons ook dieselfde stap geneem. Ons moes ook van dierbares afskeid neem. Besluit wat moet bly en wat moet saam kom. Dierbare vriende gaan groet en met 'n besef dat ons dalk nooit weer terug sal kan kom na ons geboorte land nie. Sommige van ons familie sal ons nooit weer sien nie, ook ons vriende ... Is dit die prys werd?

Ons kyk nie terug nie, en as ons ooit weer voor so 'n keuse testaan sou kom, sal ons presies dieselfde besluit geneem het.

Hoe hanteer ons die hele immigrasie storie?

Wel, ons hanteer dit asof ons na 'n ander dorp in Suid Afrika sou getrek het. Als is vreemd en jy moet baie dinge van vooraf leer. Genade, ek het nie eens geweet waar Noord of Suid is nie, en sukkel nou nog daarmee, maar dit is aan die een kant pretting en ons beskou dit as 'n uitdaging. Soms wil jy huil, soms lag jy, maar ons kyk nie terug nie. As ons voorouers dit kon gedoen het, en 'n sukses daarvan gemaak het, kan ons dit ook doen.

Wat probeer ek vir jou se?

Jy moet gaan sit en mooi dink oor die saak, want soos ons hier onder mekaar se oor immigrasie - "Dis nie vir sissies nie". Jy moet weet dat jy baie opdraendes gaan kry en jy moet deur druk. Hier is nie bediendes nie, jy moet als self doen. Dis niks snaaks om te hoor dat 'n wit vrou toilette in die aand gaan skrop nie. Dis nie 'n vernedering om til te gaanslaan as jy nie dadelik 'n werk kan kry nie, en pappas wat net gerieflik op die bank na werk gaan sit en TV kyk het, moes leer om self die voorskoot aan te sit en mamma help om als in orde te kry, want dit gaan als oor oorlewing en aanpassing.

183 verskillende kulture in een stad saam gegooi. En beland jy in 'n besuurs posisie, mag elke persoon wat onder jou werk, van 'n ander land afkomstig wees. Jy moet leer hoe hulle dink en wat hulle as humor beskou. Dit waaroor jy lag, mag vir hulle vernederend wees. Als is 'n aanpassing.

• Die huise is 'n aanpassing. Ons is gewoond in Suid Afrika dat huise en kantore van steen of klip gebou is, hier is die groot meerderheid houd. Dus moet jy leer om 'veiligheid' ten alle tye te dink om nie jou huis af te brand nie.
• Klere is anders hier. In Suid Afrika het ons dames geweet hoe om uit te hang. Ek praat nou nie van die vlenters wat jou laat dink dat daar 'n materiaal skaarste is nie. Ek praat van mooi boutique klere, kant, satyn, ens. Ja, die Balldresses vir die jonges is pragtig, maar hulle kan nogal verbeeldingloos wees vir kantoor drag. Meskien gee iemand my nog pak oor hierdie stelling. Maar kom ek verduidelik wat ek eindlik beteken. Wanneer 'n huis agent jou uit neem om na 'n plek te gaan kyk, is jy gewoonlik die enigste en is die dame of man baie netjies en professioneel geklee. Hier lyk die vrou soos 'n alledaagse huisvrou en die mans dra 'casual' klere. Hulle maak met 10 anders dieselfde tyd 'n afspraak en almal sit hul aansoeke in wat in die kantoor verwerk word. - Sien 'n agent dalk nou 'n geleentheid?
• Motor kultuur is natuurlik die beste. Skoon motors wat elke 6 maande 'n "warant of fitness" moet deur gaan. Baie goeie ding, want hier sien jy nie 'wrakke' wat hul eienaars en ander se lewens in gevaar stel nie. Die lekkerste is dat selfs die swaar voertuie net so vinnig as die motors beweeg en ons is gek na die rits houding. (Eers jy dan ek) en niemand staan ure en wag om ook op die motor weg te kan kom nie, en as jy moet af draai in 'n ander straat in, sal selfs aankomende verkeer vir jou geleentheid gee om die pad oor te steek, veral as dit 'n besige straat is. Nie soos in Suid Afrika waar jy later genoodsaak is om 'n gevaarlike kans te vat nie. En natuurlik moet ek die Siyaya's noem. Geen ongemanierde, uitdagende, woedekokende taxies wat jou siel versondig deur sommer in die middel van die pad te stop, of al 4 flikker ligte aan sit en jy moet maar raai watter kant toe hy wil draai nie. Kry jy die prentjie?
• Pakplek. O wee, dis 'n aanpassing en ek mis dit baie. Ons ken lekker baie kaste MET RAKKE, in Suid Afrika. Ongelukkig weet die Kiwies nie hoe om behoorlike kombuise of ingeboude kaste te maak nie. In die begin kon ek nie glo dat plastiek laai rakke verkoop en gebruik word nie, en dat die kamers skoon verslons lyk net omdat daar nie pak plek is nie. Jy moet self rakke koop, en dit maak die trekkery soveel groter, seker daarom dat die mark vir kamp kaste en plastiek rakke so florerend hier in New Zealand is. Ek het dit nou selfs oorweeg om van die plastiek gereedskap kaste, wat die manne gebruik in die motorhuis, aan te skaf. Dis lig om te trek, maar nie baie ooglik nie. 'n Mens moet in gedagte hou dat jy ouer word en dat die trekkery nie so maklik sal gaan wanneer jy oor 60 of 70 gaan nie. Die werk moet self gedoen word, of jy moet mense huur om jou te kom help. Gelukkig is hier jong mense wat bereid is om in te spring en te kom help met die trekkery. Sommiges wil betaling he en ander dink daaraan dat hulle ook eendag hulp nodig gaan kry van jongeres - lekker van ons Suid Afrikaanse kultuur waar jongmense die ouer mense met 'n glimlag help (al lag hulle soms in die mou)
• Kos - 'n groot verskil en 'n groot aanpassing. Ons was die skerp geure en kleure en smake van ons Suid Afrikaanse kos gewoond, en dit het 'n tydjie geneem om die kase se bleek smaak en kleur gewoond te kon raak. Sout is nie so sterk soos ons dit in SA gewoond was nie, maar hier is baie meer groente en vrugte beskikbaar as wat ons in Suid Afrika gekry het. En dit is bekostigbaar. Ons is baie dankbaar vir die SA winkeltjies waar ons nog steeds ons Mrs Balls se Blatjang kan gaan koop en die braaivleis speserye. Bietjie duurder as die plaaslike produkte, maar wat, ons gee nie om nie, want ons tonge soek nog steeds daardie skerp sensasie. Hier het ek baie ander kossoorte geleer ken en sommige van hulle sal ek nooit self koop nie. Mieliepap was so geredelik beskikbaar en nou moet ons soms maande wag voor ons weer 'n pakkie papmeel kan gaan koop. Hulle eet ook net sweet corn hier. Mensig, ek verlang soms na 'n lekker grootpit wit mielie en braaipap. Gelukkig is ek nie 'n groot pap eter nie, maar ek kry nogal van tyd tot tyd lus vir pap.
• Die weer. As oud Transvaler is die nat winter weer nogal 'n aanpassing. Vir manlief kan dit soms irriteer, maar ek geniet elke oomblik daarvan. Die somer is lekker, nie so warm soos in Suid Afrika nie, en dis niks snaaks om nog in November warm klere aan te trek nie. 'n Ou kan altyd warmer aan trek as dit koud is, maar net tot op 'n punt uit trek wanneer dit warm is ne.
  
• As jy van vogtige lug hou, is New Zealand die aangewese plek vir jou. Ons woon in Auckland, en die lug is baie vogtig. Dit laat my baie aan die Suidkus dink. Die humiditeit is nie so vel soos ons dit in SA by die see geken het nie. Ja, dit kan ook lekker bedompig warm word, maar dis net anders. Lekkerder. En wanneer laas het jy mense langs die strand gesien sit en vis en chips eet, hulle goed by hul kombers en handoeke los (sonder 'n oppasser) en die hele gesin baljaar in die water? Dis wat jy nog hier kan doen. Ek mis die geruis van die see en die breek van die branders teen die rotse. Die see is hier baie kalm. Daar is wel plekke waar die see lekker rof kan raak. Die mense van New Zealand geniet die buite lewe met 'n passie, anders as wat ons dit Suid Afrika beleef het.
• Day light savings is ook iets nuuts vir ons. In die winter word dit eers hier teen half sewe se kant lig, en dis niks snaaks om sekere dae glad nie die son te sien in die winter nie. Vandag is so 'n dag. Dit reen, is koud en skemer. Soos sommige mense se, dit lyk soos in 'n grot, maar ek geniet die weer. Pretoria was vir my te warm en te droog, en by die see was dit weer te bedompig warm. In die somer maande is dit soms tot na 9 in die aand nog daglig en kan dit jou baie gou uit gooi. Veral as jy gewoond was dat dit 8 uur in die aand al heeltemal donker was. Een voordeel is dat jy baie meer te doen kry in die somer as in die winter.
  
• Krag aansluiting, telefoon aansluitings, internet koppelings, als is goedkoper as wat ons dit in Suid Afrika beleef het, en die aansluitings is baie vinniger ook. Soms kry jy diens, soms nie. Soms gebeur dinge vinnig, en soms nie. Waarvan ek hou, en ek weet baie ander ook, is dat jy nie lank op 'hou' geplaas word wanneer jy 'n besigheid bel nie. In Suid Afrika het my swaer al 'n selfoon stukkend gegooi nadat hy meer as 'n uur "on hold" gesit is en oor en oor na dieselfde musiekstuk moes luister.
• "Noise Control" is seker een van die plus punte wat vir ons uit staan. Wanneer mense tot wie weet watter tyd partydjie hou, en soms kan dit die hele naweek, dag en nag, deur gebeur, kan jy Noise Control skakel en hulle reageer binne 'n uur, en skakel jou later om te hoor of dit nou stil is. Die polisie kom ook baie gou uit as jy hulle skakel as daar 'n probleem is, en niemand loop op die motorweg te voet nie. En gaan staan 'n motor, is die motorway patrol baie gou daar om bystand te verleen. Gaan staan jy sonder brandstof, kry jy 'n boete, want dis jou verantwoordelikheid om toe te sien dat jy genoeg brandstof in jou motor het en nie onnodig jouself en ander motoriste in gevaar stel nie. Is jou voertuig onpadwaardig, mag jy nie 'n tree verder ry nie. Hulle reel 'n insleep voertuig om dit (op jou koste) weg te sleep en hulle sal reelings tref om jou by die huis of by jou bestemming te kry as jy nie iemand het om dit te doen nie.

Vandag het ek baie voor en nadele genoem van immigrasie. Goed wat saak maak en waaraan jy moet dink. Indien jy meer inligting oor immigrasie self het, kontak ons gerus. Ons kan jou in kontak met iemand bring wat betroubaar is met immigrasie en wat beter inligting as net die algemene ander goed kan gee. Of besoek die New Zealand se IMMIGRASIE DIENS self en lees meer daaroor.

Partye se regte in 'n huurooreenkoms

In minder as 'n jaar, het ek sewe keer moes trek.

Hoe so?

Die eerste trek was van ons eiendom nadat ons die hoewe verkoop het. Dit was GROOT werk, want ons het byna veertien jaar daar gewoon en het 'n klomp gemors ook op gegaar wat uit gesorteer moes word. Verder moes ek besluit wat ek wou saam neem New Zealand toe en wat nie. Ons het op 'n klein houervrag besluit en daar kan nie veel in nie. Ons moes in 'n huis in die dorp gaan woon het tot tyd en wyl ons sou vertrek, en ALS moes uitgepak word binne 'n maand en 'n half want die vervoer maatskappy moes self pak anders kan ons nie versekering op ons goed kry nie.

Ek wil eers vir 'n rukkie hier stil staan en jou gedagtes in 'n ander rigting stuur. As ons kon oor kies, sou ons als in Suid Afrika verkoop het en net DIE belangrikste hierheen laat kom het. Wat die verpakkers gedoen het, was om kartonne spesiaal vir hul self te pak en te merk. Ons het geweldig verlies gely as gevolg hiervan. Nadat ons die meubels later op 'n veiling laat verkoop het, (en ons byna niks vir byna splinter nuwe goed gekry het, omdat ons nie self teenwoordig kon wees nie), het baie meer goed "voetjies" in 'n ander rigting gekry. Ons het hierdie besluit geneem omdat ons immigrasie dokumente gelsoer het en ons nie ons besittings kon laar oor kom voor als nie in plek is nie. Sommige mense ondervind nie probleme nie, en ander weer. Dit gaan nie altyd maklik nie. Als hang van jou immigrasie offisier af. Die kartonne het 8 maande later hier geland en ons was baie opgewonde. Een karton het 'n naam op gehad. Sameul het nie sy een gemerkte karton gekry nie. Als was so strategies beplan hoor. Die enkel beddens het tussen neus en oe verdwyn plus AL die beddegoed en als wat in my spaar kamer was, buiten die 'Sameul' gemerkte karton.

Gedink die versekering betaal uit? Daar is elle lange stories hieroor en ons het moed op gegee. Dis absoluut nag om vanuit New Zealand reelings te kan tref en navraag antwoorde uit Suid Afrika te kry. Die stories wat vertel word laat 'n mens net jou kop skud.

Terug by ons trekkery in New Zealand self. Dit is nie vreemd dat immigrante baie rond trek nie, want jy moet gaan waar die werk is, en daar is baie ander faktore wat ook 'n rol speel. Juis om hierdie rede moet jy vertroud wees met die regte in huurooreenkomste met verhuurders, of landlords, soos ons dit hier noem.

Huurder se regte:

A: 'n Huurder moet

• Die huur betyds betaal
• Die eiendom slegs as 'n woning gebruik
• Die eiendom skoon en netjies hou
• Dadelik enige skade/herstel raporteer
• Enige skade wat deur die huurder of hul gaste plaasgevind het, self herstel of laat herstel.
• Nie meer persone huisves as wat in die ooreenkoms genoem is nie

B: Aan die einde van die ooreenkoms moet die huurder:

• Die dag vertrek volgens die ooreenkoms of voor die datum verstreke is.
• Alle goedere en gemors van die perseel verwyder.
• Die eiendom skoon en netjies agter laat.
• Alle sleutels en 'pass cards' in handig
• Alle toebehore in 'n goeie toestand laat.
• Toegang verleen aan voornemende huurders of kopers.
• Elektrisiteit, telefoon en ander rekeninge betaal waarvoor hulle aansoek gedoen het.

C: 'n Huurder moet nie:

• Die eiendom beskadig of ander toelaat om dit te doen nie.
• Die eiendom vir onwettige doeleindes gebruik, of ander toelaat om dit te doen nie.
• Die vrede van ander huurders en bure versteur nie.
• Die eiendom of slotte verander nie.
• Regmatige toegang aan die landlord of hul agent weier nie.
• Onderverhuring of oordrag van die huurooreenkoms sonder toestemming doen nie.

Die Landlord se regte en verantwoordelikhede.
A: 'n Landlord moet:

• 60 Dae kennis gee van huur verhoging
• 48 uur kennis gee vir inspeksie
• 24 uur kennis gee om die eiendom te betree vir herstel werk
• 42 dae kennis gee van beplanning om die eiendom te verkoop
• Verseker dat alle slotte en knippe werk
• Kwitansies van kontant/tjek betalings gee - en maak seker dat jy dit kry.
• Huur rekening gee as dit gevra word.
• Alle nodige herstelwerk doen
• Vir dringende herstelwerk betaal.
• 'n Skoon en bewoonbare eiendom aanbied.
• Kostes soos versekering en belasting van die eiendom/gebou betaal.
• Verseker dat die huurders nie onnodig gesteur word nie.

B: 'n Landlord mag nie:

1. Redelike her verhuring of redelike onderverhuring blokkeer nie.
2. Die gebruik van bruikbare binnenshuise toerusting verhinder nie.
3. Slotte sonder medewete van die huurder verander nie.
4. Toegang tot die eiendom sonder toestemming of wettige reg betree nie.

Dit is punte wat baie maklik deur verhuurders mis gekyk word, veral as jy 'n immigrant is en nie vertroud is met al die wetlike aspekte nie. Moet niks as vanselfsprekend aanvaar nie, nie eens as jy van 'n mede Suid Afrikaner huur nie, want jy is die een wat op die ou end aan die kortste ent trek.

Indien jy meer inligting wil bekom, gaan besoek die staat se webblad

Indien jy enige vra het, vra dit asb in die comments. Ek sal jou eerlik en reguit antwoord op jou vrae.
Ek wil dit asb baie duidelik stel dat ek nie 'n immigrasie inligtings beampte is, of aan jou enige inligting rondom immigrasie self kan gee nie. Hierdie blog is net my eie ondervinding en wat ek van mede Suid Afrikaners ontvang het wat alreeds deur die hele proses gegaan het. Indien jy enige inligting oor immigrasie wil bekom, kan jy Walter Stone kontak. Noem asb hierdie blog as jou verwysing.

Vrae rondom werkspermit aansoeke

'n Vraag wat aan ons gevra is rondom die aansoek van 'n werkspermit vir man en vrou het my genoop om hieroor te praat.

Ek is glad nie 'n raadgewer op hierdie gebied nie, maar ek gee net ons eie ondervinding hier omdat daar baie onsekerheid by mens op kom in hierdie verband.

Vir ons is gese dat Lourens eers aansoek moet doen en dan moet ek. Die immigrasie offisier het ons ook verkeerdelik ingelig dat ek "veilig" is terwyl hulle met sy aansoek besig is, wat blyk onwaar te gewees het. Toe ons, nadat hy sy werkspermit gekry het, haar vra wanneer ek my paspoort moet in bring sodat dit gestempel kan word, het sy gese ek val outomaties onder hom.

Dit het my gepla. My een vriendin het my vertel van 'n ander paar wat dieselfde trap af getrap het en die vrou is na haar land van herkoms gedeporteer. Hulle het dit vanselfprekend aanvaar. Ek het immigrasie gebel en die man het vir my gese dat ek onwettig in die land is omdat my besoekers permit reeds byna drie maande gelede verval het. Ek het aan hom verduidelik wat die immigrasie offisier gese het en hy was baie vriendelik en simpatiek met die hele situasie. Hy het onmiddelik vir my vorms per koerier gestuur wat ek moes in vul en ook wat ek moet doen.

Ek moes 'n motiverings brief skryf waarom ek onwettig in die land was, wat ek ook gedoen het en ek het nie geskroom om die immigrasie offisier, wat die vals inligting gegee het, se naam te noem nie. Hier is dit nou nie meer 'n kwessie van jammer kry nie. Dis of die waarheid of ek word terug gestuur Suid Afrika toe.

Dit was 'n langer proses as wat dit met Lourens se permit was. As gevolg van die spanning was my bloeddruk hoog toe ek vir my mediese toetse gegaan het. Dit het $350 gekos. Immigrasie het dit nie so aanvaar nie en dit na 'n assessor gestuur vir sy opinie, wat my weer aanbeveel het om 'n spesialis te gaan spreek. Nog 'n verder $460. Die spesialis het niks fout gevind met my hart nie en het gese dat dit bloot spanning is as gevolg van ons immigrasie. Al die immigrante ondervind bloeddruk probleme as gevolg van die spanning, veral as dit 'n bietjie langer draal as wat nodig is. Dit was net voor Desember en ek het eers in Januarie my werkspermit gekry.

Dus die antwoord op die vraag - Doen alby gelyk aansoek daarom en dieselfde vir PR (Permanente Residensie).

Sorg dat jy jou Polisie Clearance kry net voor jy oor kom sodat daar ten minste nog genoeg tyd oor is wanneer jy jou aansoek om 'n werkspermit indien.

Sorg dat jy genoeg (ten minste 10) afskrifte van al jou dokumente het en dat dit klaar beedig is voor jy oor kom.

Sodra jy hier land, en jy nog jou paspoort in jou besit het, gaan verander dadelik jou bestuurslisensie by AA kantore. Dit sal vinnig gaan en dit neem so 'n week om jou nuwe New Zealandse bestuurslisensie te kry deur die pos. Dit dien as identifikasie, veral wanneer jou paspoort by immigrasie is.

Indien jy meer oor immigrasie wil weet en wat om te doen, gaan na NZimmigration.

Die Immigrasie rit

Dit kan 'n nagmerrie word veral as jou fondse nie sterk is nie. Immigrasie neem hul tyd en jy moet maar net wag, en 'n mens moet hulle ook nie druk nie. Jy moet werklik Job se geduld met hulle he.

My man het sy Level 1,2 en 3 vir elektries moes doen, wat op die ou end blyk onnodig te gewees het net as gevolg van "Afrika tyd". Dit is werklik baie hartseer dat Suid Afrika so verval het en dat 'n mens net nie diens uit enige departement van watter organisasie ook al kry nie. As gevolg van hierdie sloerdery, het dit ons 'n hele paar duisend dollars onnodig uit die sak gejaag, maar hy het dit met lof geslaag en is nou 'n NZQA geregistreerde elektrisien wat onbeperk is. Weet net dat jy hierdie toetse baie ernstig moet op neem. Hier is 'n hele paar Suid Afrikaanse mans wat dink hulle "weet" en dan tot die besef kom dat dit nie werklik so maklik is nie. Sommige van hulle sukkel al reeds 2 jaar om dit te kan slaag. Gelukkig het hulle werk, en dit mag dalk die probleem wees dat hulle 'gemaklik' voel en dink dat hulle maar die volgende sessie weer kan doen. Hierdie toetse kan net 2x per jaar geskryf word. Julie en dan November.

Wat het in tussen met ons gebeur?

Die eerste werkgewer is bankrot en dit het beteken dat my man nie vir iemand anders mag gaan werk het nie. Dit was baie frustrerend en kommer wekkend, wat die fondse het min begin raak. SA Rand kan ook net so ver gaan. Toe ons oor gekom het was NZ$1 gelyk staande aan R5.78.

Ons het werklik ons New Zealand Immigrasie met geloof aan gepak en die Here het vir ons gesorg. Nadat my man sy registrasie ontvang het (8 Maande na ons hier geland het) kon hy weer aansoek doen vir 'n ander werk en het 'n baie goeie pos gekry. Dit het 'n volgende uitdaging aan ons gestel.

Hy mag nog steeds nie werk nie, nie voordat die eerste permit om geswaai is na die nuwe werkgewer nie. Ek noem hierdie dinge sodat die persone wat dieselfde moontlik moet doen, nie moedeloos raak nie. Dit is nog alles die moeite werd om hierdie pad te stap. Om 'n permit te swaai kos minder as die oorspronklike permit en dit neem 'n maksimum van 42 dae.

Ek het sedert September 2009 tot Februarie 2010 vir my permit gewag.

Wanneer jy besluit om New Zealand toe te kom, moet jy weet dat dit 'n lang wag vir jou kan wees. Sommige mense is gelukkig en kom baie gou reg.

Paar punte om in gedagte te hou en te doen voor jy oor kom.

1-> Sorg dat jy al jou dokumente reg het soos skool sertifikate en ander.

2-> Genoeg verwysings briewe het wat kan bevestig wat jy gedoen het, selfs die ure wat jy gewerk het.

3-> Jou Polisie klaring nie ouer is as 'n maand voor jy vlieg nie.

4-> Onverkorte geboorte sertifikate reg is en as dit nie is kan jy dit hier teen 'n prys laat doen. Baie mense doen dit hier en dit werk vinniger as om dit in Suid Afrika te doen.

5-> Stuur jou dokumente vooruit, doen vroegtydig aansoek by EWRB vir verifieering as jy 'n ambagsman is.

6-> Sorg dat jy genoeg fondse het om jou en jou familie vir die eerste jaar te kan dra. Ek noem spesifiek vir 'n jaar, want jy weet nie hoe dinge hier vir julle mag verloop nie en jy kan baie gou in kookwater beland as dinge langer uit rek as wat jy gehoop het. Afhangende van hoeveel mense julle is wanneer julle oor kom, gaan jy om en by $350 - $450+ per week nodig he vir behuising. $160+ per maand vir krag, $180 - $280 per week vir kos (alles in gesluit), $50 'n week vir brandstof en as jy 'n foon en internet wil laat installeer gaan dit jou om en $120 per maand kos.

Join Me at Joini5

Waarom het ons Suid Afrika verlaat?

Die afgelope week is ons baie met DIE vraag gepeper vanuit Suid Afrika.

Politiek?

Regstellende Aksie?

Misdaad?

Ek het baie die afgelope paar dae oor Suid Afrika gelees en daar is geen heimwee in my oor my vaderland nie. Dit klink erg en ek word kwalik geneem hieroor, maar dit is 'n besluit wat ek en Lourens geneem het en ons is nie een dag spyt hieroor nie. Na 8 maande in New Zealand wonder ons waarom ons dit nie lankal gedoen het nie.

Politiek?

Ja, dit het 'n groot rol gespeel. Hier in New Zealand is dinge net anders. Hier is ook maar probleme, maar dit kan nie met Suid Afrika te politieke probleme vergelyk word nie. Twee maande gelede het ek 'n swart vrou uit Zimbabwe ontmoet en haar antwoord aan ons, op 'n vraag wat ons nie eens gevra het nie, het dit baie duidelik op gesom.

Ek het haar gevra waar sy vandaan kom, soos wat die meeste Suid Afrikaners maar doen. Ek kon sien dat sy van die Suidelike Afrikane afkomstig is. Sy het ons meegedeel dat sy van Zim af komstig is en so 8 maande in die Suide van Pretoria gewoon het, maar "we fled from South Afraca, because Zuma isn't different from Mogabe. As a matter of fact, he is worser."

Regstellende Aksie?

Ja, daar is geen vooruitsigte vir ons of ons kinders om opgang in Suid Afrika te maak nie. Ons kinders was almal in die buiteland en ons een dogter het 'n jaar gelede terug gegaan na Suid Afrika, nadat sy byna ses jaar in die UK was. Sy het baie goed vir haarself gedoen en toe sy vir werk aansoek doen in Suid Afrika moes sy hoor dat sy 'n bedreiging is, want haar kwalifikasies is hoer as die minister van Gesondheid en hulle is bang dat sy vir die pos sal mik.

Wat het op die ou end gebeur? Sy het gemaak asof sy geen kwalifikasies het nie en het uiteindelik 'n werk gekry. Ek het nie lus om verder oor regstellende aksie te praat nie, want ek sal vir dae aaneen hieroor kan praat, en ek glo daar is baie wat self ook 'n paar verhale kan vertel.

Misdaad?

Ja beslis. Dit was asof die kring al nouer en nouer om ons begin trek het. Drie dae voor ons vlug na New Zealand is twee mense, 60 en 62 jaar onderskeidelik - man en vrou - so vermink met hammers in die gesigte dat hul eie kinders hul nie kon uit ken nie.

Moet ek meer vertel?

Nee, ek het die stof van Suid Afrika van my voete geskud en ons het die uitdaging aanvaar om van vooraf in 'n vreemde land te begin. Dit is nie maklik nie, maar die swaar hier, kan nie eens in dieselfde sin genoem word as die swaar in Suid Afrika nie.

Ek weet nie eens of ek die guts het om net in Suid Afrika te gaan kuier nie. Ek sien nie meer kans vir die verkeer, verkeers woede, afpersery, ...

Ek kan nou nog nie oor die feit kom dat die poliesie my een dag voor gekeer het en my blatant van dronkenskap wou aankla nie. Dit was 4 weke voor ons sou vlieg. Voor in die paneel kissie was daar 2 s/steel bekertjies wat ons altyd gebruik het om koeldrank of water uit te drink wanneer ons ry. Op grond van die 2 bekertjies het die polisie vrou my daarvan beskuldig dat ek 'drink and drive' en dat dit my woord teen hare is. Haar kollega het saam gestem en ek moes hulle R100 betaal voor hulle my laat gaan.

Ek kon nie bekostig dat ek so 'n rekord op my naam kry nie en ek het New Zealand voor my gesien. Die woede en vernedering wel nou nog in my op wanneer ek daaraan dink.

Wat is die verskil in New Zealand?

Ons het eendag op die motor weg gestop om na die pad kaart te kyk, voor ons 'n GPS gekry het. Die verkeers polisie het kom navraag doen en ons gese dat dit onwettig is om op die motor way te stop. Ons het haar gese dat ons van Suid Afrika is, en sy was baie vriendelik en behulpsaam. Ons is nie eens met 'n waarskuwing laat gaan nie, maar is 'n goeie dag toe gewens en mooi verduidelik wat ons moet doen om nie ander motoriste in gevaar te stel nie.

As ons weer die geleentheid gegun word om 'n keuse te maak, sal ons beslis presies dieselfde keuse maak.

Almal wat New Zealand toe kom, en ek glo dat dit dieselfde in Australie is, stap maar 'n pad wat nie aldag maklik is nie. Immigrasie sit nie sommer net so in jou klere nie. Jy moet geduld he en bereid wees om die pad te stap.

Daar is die medies, wat terug gestuur kan word, eksamens vir elektrisiens wat geskryf moet word, maak nie saak of jy 'n ingeneur of net 'n ambagsman is nie. Al hierdie dinge kan nogal baie senutergend wees, maar dit bly nog steeds die moeite werd.

Die Suid Afrikaanse gemeenskap hier ondersteun mekaar geweldig. Ons het nie eens in Suid Afrika soveel ondersteuning ondervind nie. Die meeste mense weet dat dit nie aldag maklik is met immigrasie nie, en die wat al daar deur is staan jou by om jou te bemoedig. Dit help nie om 'n 'tantrum' te probeer gooi soos wat ons uit pure frustrasie in Suid Afrika gedoen het nie.

Wanneer jy hier kom, moet jou hele houding verander. In Suid Afrika het ons baie ongeduldig geraak, en dit is te verstane. Hier moet jy ook maar wag tot hulle besluit het om die dokumente af te handel, maar ons is geduldig want dit is ons hele toekoms wat op die spel is. In Suid Afrika is ons getart met 'n houding, 'jy sal wag', en dan is daar sommer in jou gesig gelag omdat jy kwaad word.

Vir ons is dit 'n lewe wat verby is en ons kyk nou net vorentoe. Pak die lewe aan en aanvaar die nuwe uitdagings wat aan ons gestel word. Daar is nie meer vrees en moedeloosheid nie. My hart gaan uit na my mense wat nog in Suid Afrika vas gevang is. My volk wat moedeloos en negatief geword het. Ek sal nooit ophou bid dat dinge in Suid Afrika moet draai nie, en al draai dit, sal ek nog steeds nie terug gaan nie.

New Zealand het ons nuwe tuiste geword. Ons het 'n besluit moes neem, wat nie vir almal aanvaarbaar en maklik is nie en nog minder kan baie dit verstaan. Ons verwag van niemand om dit te verstaan nie.

As jy die gevoel in jou hart gekry het om Suid Afrika te verlaat, moet jy weet dat daar 'n opdraende pad voor jou le. Dit is nie maklik nie, maar die gemoedsrus, die vrede, die veiligheid kan nie opweeg teen dit wat ons in Suid Afrika beleef het nie. Suid Afrika het ons hard gemaak. Elke Suid Afrikaner is 'n 'survivor', ongeag wie of wat jy is.

Waarom het ek die blog begin?

Sodat mense wat nog in Suid Afrika is, kan sien hoe ons in New Zealand leef, maar die groot beweeg rede was om mense oor ander aspekte van immigrasie in te lig. Ek is bereid om jou in kontak te bring met geregistreerde immigrasie agente, maar kan ongelukkig nie self vir jou die inligting hieroor gee nie.

Wat ek wel doen is om vir jou die ander kant uit te lig. Dinge wat jy moet weet. Dinge wat ons graag wou geweet het, maar niemand bereid was om vir ons te vertel nie omdat hulle bang was dat dit ons sou kon af skrik. Niks sou my en Lourens af geskrik het nie want ons het 'n doelgerigte besluit geneem en deur gevoer, en ons is dankbaar dat ons dit gedoen het.

Hou een ding in gedagte. Immigrasie is nie maklik nie. Soos die gesegde hier is : Immigrasie is nie vir sissies nie. Immigrasie toets jou op ander gebiede waarmee jy nog nie in jou lewe te doene gekry het nie.

Jy kan nie jou Bybel en Jesus in Suid Afrika los en dink jy gaan staande bly nie. Dis al die pad kniee werk tot jy PR gekry het. PR = Permanente Residensie.

In samewerking met Immigration New Zealand plaas ek van tyd tot tyd artikels oor aspekte soos verblyf, die wetlike aspekte rondom dit. Vandat ek met dit begin het, het selfs oud immigrante wat al 'n paar jaar hier woonagtig is, baie daaruit kon leer en ek is dankbaar dat ek op so 'n manier tot diens vir julle kan wees.

As jy enige vrae, het, plaas dit gerus onder komments. Daar mag dalk iemand anders wees wat dieselfde vraag het. Ek sal dit enige tyd vir jou so eerlik as moontlik beantwoord, en as ek nie die antwoord ken nie, sal ek vir jou die antwoord gaan soek tot ek dit vind.